လေးအိမ်တန်းက ဒေါ်လေးစာ
ခိုင်မာကျော်ဇော
မေ ၁၇၊ ၂၀၀၉
စိတ်ဆင်းရဲလိုက်များ
ပြောတောင် မပြောချင်တော့ပါဘူး။
‘ဒီမိုကရေစီခေါင်းဆောင်’
‘အောင်ဆန်းစုကြည်’ကို
‘အင်းစိန်ထောင်’ကို ပို့လိုက်ပြီတဲ့။
ရပ်ထဲ ရွာထဲလည်း
ဒီအကြောင်းပဲ ပြောနေကြတယ်။
အိမ်ထဲမှာတင် ကြိတ်ကြိတ်နဲ့
တိုးတိုးတိတ်တိတ် ပြောနေကြတာ မဟုတ်ဘူး။
လယ်ထဲဆင်းလည်း ဒီအကြောင်း
ရေခပ်ဆင်းလည်း ဒီအကြောင်း
ငါးရှာထွက်လည်း ဒီအကြောင်း
ဟင်းရွက်ခူးလည်း ဒီအကြောင်း
ရွာဦးဘုန်းကျောင်းထဲလည်း ဒီအကြောင်း
မြို့တက် ဈေးဝယ်ထွက်တော့လည်း အကြောင်း
၅ နှစ်အရွယ် ကျုပ်မြေးလေးတောင်
‘အောင်ဆန်းစုကြည်’ အကြောင်းကို
စိတ်ဝင်တစား မေးတယ် ဆိုတော့
သူတို့ ကျောင်းထဲလည်း
ဒီအကြောင်းပဲ ပြောနေကြလို့ နေမှာပေါ့။
ကျုပ်ကို မြေးက မေးတယ်။
“လူတွေချစ်တဲ့ ဒေါ်စုကို သူတို့က ဘာဖြစ်လို့ အင်းစိန်ထောင်ကို ပို့တာလဲ”တဲ့။
‘အောင်ဆန်းစုကြည်’ကို
သူတို့ ကြောက်လို့ လို့ …
ကျုပ် မဆိုင်းမတွပဲ ဖြေလိုက်တယ်။
ကျုပ်မြေးကတော့
မျက်လုံးလေး ကလယ်ကလယ်နဲ့
နားမလည်ရှာဘူး။
ဟုတ်တယ်
သူတို့ ‘အောင်ဆန်းစုကြည်’ကို ကြောက်တယ်။
‘မင်းကိုနိုင်’ကို ကြောက်တယ်။
‘အရှင်ဂမ္မီရ’ကို ကြောက်တယ်။
‘ခွန်ထွန်းဦး’ကို ကြောက်တယ်။
‘ဇာဂနာ’ကို ကြောက်တယ်။
‘သံဃာတော်တွေ’ကို ကြောက်တယ်။
‘ကျောင်းသားတွေ’ကို ကြောက်တယ်။
အိုး … လူ့အခွင့် သိသူမှန်သမျှကို
သူတို့ ကြောက်နေကြတယ်။
စစ်သည်တော် ၄ သိန်းကျော် ခြံရံထားတဲ့
စစ်ဗိုလ်ချုပ်ကြီးတွေ
သုံးတောင်ဝတ် မိန်းမသားနဲ့
မျက်နှာချင်းဆိုင်ပြီး စကားမပြောရဲတာဟာ
ကြောက်နေလို့ပဲပေါ့။
တွေ့ပါ၊ ဆုံပါ၊ စကားပြောပါလို့
ကမ္ဘာ့ကုလသမဂ္ဂကြီးက တိုက်တွန်းနေတာကြာပြီပဲ။
နိုဘယ်ငြိမ်းချမ်းရေးဆုရှင်
မြန်မာ့ဒီမိုကရေစီခေါင်းဆောင်
ကျုပ်တို့ရဲ့ ‘အောင်ဆန်းစုကြည်’ကလည်း
ကျမတို့ တွေ့ဆုံဆွေးနွေး ကြရအောင်လို့
တောင်းဆိုနေတာလည်း အခါခါပဲလေ။
ဒီနေ့ထက်ထိ မပြောသေးတာ
စစ်ဗိုလ်ချုပ်ကြီးတွေရဲ့ ပြဿာနာပဲပေါ့။
ဒီအကြောင်းတွေ
ကျုပ် သိနေလို့ အံ့အားတော့ မသင့်ကြပါနဲ့။
ကျုပ်တို့ရွာမှာ
‘ဘီဘီစီ၊ ဗွီအိုအေ၊ ဒီဗွီဘီနဲ့ အာအက်ဖ်အေ’
“နားမထောင်ရ” ဆိုတဲ့ အမိန့်တွေ ထုတ်လိုက်တည်းက
အဲဒီဌာနတွေက ထုတ်လွင့်တဲ့ သတင်းတွေမှန်သမျှ
နေ့ည မပြတ် ကျုပ်နားထောင်တယ်။
ပြီးတော့ ကျုပ်
ရွာထဲလိုက် ဖောက်သည်ချတယ်။
ဒါ ကျုပ် ရဲ့အခွင့်အရေးပဲလေ။
သူတို့က
ကျုပ်တို့ရဲ့ မျက်စေ့၊ ပါးစပ်တင်မက
နားတွေကိုပါ အကျဉ်းချ ထားချင်သေးတာ။
ဘယ်ရမလဲ အခု ကျုပ်
ဒီမိုကရေစီဆိုတာကို သိလာရပြီ။
လူ့အခွင့်အရေးဆိုတာကို သိလာပြီ။
ကျုပ်ကို လယ်သူမကြီးဆိုပြီး
အထင်တော့ မသေးကြနဲ့
နာဂစ် ဖြစ်လို့
ကျုပ်တို့ ပြည်သူတွေ ဘဝပျက်ခဲ့ကြပေမယ့်
စစ်ဗိုလ်ချုပ်ကြီးတွေ စီးပွားတက်သွားတာကို ကျုပ်သိတယ်။
တရုတ်၊ ကုလားနဲ့ ယိုးဒယား
ကျုပ်တို့နိုင်ငံက သယံဇာတွေကို
စစ်ဗိုလ်ချုပ်တွေနဲ့ ပေါင်းပြီး ခိုးစားနေတာ ကျုပ်သိတယ်။
ကမ္ဘာ့အရပ်ရပ်လူတွေ ကျုပ်တို့ဘဝကို ကိုယ်ချင်းစာသူလည်းရှိ
နှာစေးသူတွေလည်း ရှိတယ်ဆိုတာ ကျုပ်သိတယ်။
အခုလည်းပဲ
အမေရိကန်က ယက်တော
ရေကူးပြီး ‘အောင်ဆန်းစုကြည်’အိမ်ထဲ ခိုးဝင်မှုနဲ့
အင်းစိန်ထောင်ထဲ ရောက်နေတာကို ကျုပ်သိတယ်။
‘အောင်ဆန်းစုကြည်’ကိုလည်း
ဒီအမှုနဲ့ စွဲချက်တင်လိုက်ကြတာပဲလေ။
ဒါတင်ဘယ်ကမလဲ
သူ့ရှေ့နေ နှစ်ဦးကိုလည်း အမှုလိုက်ခွင့်မရအောင်
လိုင်စင်တွေ သိမ်းလိုက်ကြတယ်တဲ့။
တကယ်ကတော့
‘အောင်ဆန်းစုကြည်’ရဲ့
နေအိမ်အကျယ်ချုပ်လွတ်ရက်က
အခုလမှာ စေ့ပြီလေ။
ကျုပ်တို့ခေါင်းဆောင်
အိမ်ပြင်ထွက်၊ လမ်းပေါ်တက်ပြီး
‘ဒီမိုကရေစီအရေး’
‘လူ့အခွင့်အရေး’
‘ကျုပ်တို့အားလုံး’ရဲ့အရေးအတွက် လုပ်မှာကို
သူတို့ ကြောက်နေကြတယ်။
ကြောက်ဆို
သူတို့ အတင်းအဓမ္မ ကျင်းပမယ့်
၂ဝ၁ဝ ရွေးကောက်ပွဲကလည်း နီးလာပြီလေ။
အဲဒီရွေးကောက်ပွဲမှာ
‘အောင်ဆန်းစုကြည်’ ပါတီက မဲပုံးထောင်ရင်
၁၉၉ဝ လိုပဲ
သူတို့ အရှုံးကြီး ရှုံးအုံးမှာပဲ။
သူတို့က သေနတ်အားကိုးနဲ့ပဲ
ကျုပ်တို့ကို အုပ်စိုးနေတာ။
သူတို့မှာ ကိုယ့်ပြည်သူပြည်သားရယ်လို့
စာနာသနားတတ်တဲ့ စိတ်ထားမရှိဘူး။
သူတို့မှာ အကြင်နာ တရားမရှိဘူး။
မေတ္တာတရား မရှိဘူး။
မင်္ဂလာတရား မရှိဘူး။
သူတို့မှာ ဆင်ခြင်တုံတရားလည်း မရှိဘူး။
ဘုရားသားတော် သံဃာတော်တွေတောင်မှ
သတ်ရဲ ဖြတ်ရဲတဲ့ သူတို့ရဲ့ မိုက်မဲမှုဟာ
အဝီစိငရဲကို ဂျွမ်းပစ်ကျဖို့ပဲ ရှိတော့တယ်။
တရားသဘောနဲ့ ကြည့်ရင်
ဘယ်အရာမှ မမြဲပါဘူး။
စစ်ဗိုလ်ချုပ်ကြီးတွေပဲ အမြဲ စံနေရမှာမဟုတ်သလို
ကျုပ်တို့ ပြည်သူတွေလည်း အမြဲ ခံနေရမှာမဟုတ်ပါဘူး။
ပြည်သူကမွေး၊ ပြည်သူ့က ကျွေးတဲ့
ပြည်သူ့ တပ်မတော်သားတွေကိုတော့
ကျုပ်တခုပဲ ပြောချင်ပါတယ်။
ပြည်သူတွေကို သနားပါ။
ပြည်သူတွေကို စာနာပါ။
ပြည်သူတွေကို ကာကွယ်ပါလို့
ဗိုလ်ချုပ်ကြီးတွေ မိုက်သမျှ
ခံရမယ့် ငရဲမှာ
ငါ့သားတို့ မပါကြပါနဲ့ လို့။
‘အောင်ဆန်းစုကြည်’ ပြောဖူးတယ်။
‘မတရားတဲ့ အမိန့်ဟူသမျှ ဖီဆန့်ကြ’တဲ့။
ငါသားတို့ စစ်ဗိုလ်ချုပ်ကြီးတွေရဲ့
မတရားတဲ့ အမိန့်တွေကို နာခံမနေကြပါနဲ့။
ပြည်သူ့တပ်မတော်သားများ
ပြည်သူများ၊
ပြည်သူ့ခေါင်းဆောင်များနဲ့ အမြန်ဆုံးလက်တွဲပါလို့
လေးအိမ်တန်းက ဒေါ်လေး
ဒီမိုကရေစီ ရေကြည်တပေါက်ကို
ငါ့သားတို့နဲ့ အတူသောက်ချင်လှပါပြီကွယ်။ ။
(သရုပ်ဖော် - ပန်းချီထိန်လင်း)
No comments:
Post a Comment